तिलोत्तमाको अन्नपूर्ण एग्रो इण्डष्ट्रिज दाेश्राेपटक नेपालमै उत्कृष्ट करदाता घोषित

तिलोत्तमा,मंसिर ८-रुपन्देहीकाे तिलोत्तमामा रहेको अन्नपूर्ण एग्रो इण्डष्ट्रिज प्रा.लि दाेश्राेपटक पनि उत्कृष्ट करदाता घोषित भएकाे छ । नेपाल सरकारले ९औं राष्ट्रिय कर दिवसको अवसर पारी उत्कृष्ट करदाता घोषणा गरेको हाे ।  आन्तरिक राजस्व विभागले कर सप्ताहको अन्तिम दिन उत्कृष्ट १५ करदाताको नाम घोषणा गरेको छ । विभागका अनुसार कृषि एवम् पशुपंक्षी उद्योगमध्ये सबैभन्दा बढी आयकर तिर्ने करदाता अन्नपूर्ण एग्रो इण्डष्ट्रिज प्रालि घोषित भएको हाे । यसअघि पनि आर्थिक वर्ष २०७४/०७५ मा पनि  अन्नपूर्ण एग्रो उत्कृष्ट करदाता भइ सरकारबाट पुरस्कृत भएकाे थियाे ।

आयकरतर्फ आर्थिक वर्ष २०७५/७६ र मूल्य अभिवृद्धि करतर्फ आर्थिक वर्ष २०७६/७७ लाई आधार मानेर सरकारले उत्कृष्टकाे  सूची निकालकाे हाे । यस वर्ष व्यक्तिगत आयकरतर्फ सबैभन्दा बढी कर तिर्ने उद्योगी विजयकुमार शाह छन् । उनी विभिन्न लिकर कम्पनीका मालिक हुन् । विभागका अनुसार आव २०७५/७६ मा सबैभन्दा बढी कर तिर्ने कम्पनी सूर्य नेपाल भएको छ । निर्यातकर्तामध्ये सबैभन्दा बढी आयकर तिर्ने कम्पनी भने डाबर नेपाल प्रालि रहेको छ । बढी आयकर तिर्ने विशेष उद्योगका रुपमा हिमाल पावर कम्पनी उत्कृष्ट घोषित भएको छ । पर्यटन व्यवसायमध्ये सबैभन्दा बढी आयकर तिर्ने कम्पनी तारागाउँ रिजेन्सी होटेल्स लिमिटेड छ । विप्रेषणको कारोबार गर्ने कम्पनीमध्ये बढी आयकर आइएमई लिमिटेडले तिरेको छ ।बैंक तथा वित्तीय संस्थामा बढी आयकर तिरेको नविल बैंक उत्कष्ट ठहर भएको छ ।