लुम्बिनी फ्रिडम मिडिया प्रा.लि द्वारा संचालित
काठमाण्डौ ।जेन–जी पुस्ताले देशव्यापी रूपमा गरेको प्रदर्शनका कारण देशको राजनीतिक, आर्थिक, सामाजिक, शिक्षा, स्वास्थ्यलगायतका क्षेत्र प्रभावित भएको छ ।दुई दिनअघिको काठमाण्डाै केन्द्रित प्रदर्शन देशव्यापी फैलिएर सबैजसो क्षेत्र प्रभावित भएको देखिन्छ । विशेषगरी पहिलो दिन नयाँबानेश्वर क्षेत्रमा भएको प्रदर्शनमा घाइते भएका बिरामीको उपचार गर्न अस्पतालहरूलाई भ्याइनभ्याइ भएको अवस्था छ ।मीनभवनमा रहेकाे सिभिल अस्पतालले बिरामीको चाप अत्यधिक भएसँगै आकस्मिक सेवाबाहेकका अरू सेवा अहिले बन्द गरेको छ । अस्पतालका निर्देशक डा. मोहनचन्द्र रेग्मीका अनुसार बिरामीका लागि खानालगायत अत्यवश्यक सेवा पुर्याउन कठिन भएको छ ।
‘स्रोत साधनको समस्या छ, जनशक्ति व्यवस्थापन पनि त्यत्तिकै चुनौतीपूर्ण छ । चिकित्सक तथा नर्सहरू डबल ड्युट' गरेर भए पनि अहोरात्र खटिनुभएको छ तर अहिलेलाई ओपीडी र ओटी सेवा बन्द गरिएको छ’, उहाँले भन्नुभयो, ‘हिजोदेखि ड्युटीमा आएका आजमात्र घर फर्किँदै हुनुहुन्छ। अहिले अस्पतालमा प्रदर्शनमा घाइते भएका ४६ जनाको उपचार भइरहेको छ ।’त्रिवि शिक्षण अस्पतालले पनि प्रदर्शनमा घाइते भएकाहरूलाई उच्च प्राथमिकता दिई उपचार गरिरहेको अस्पतालका निर्देशक डा. सुवास आचार्यले जानकारी दिनुभयो ।‘अत्यावश्यक र रेफर भएर आएका बिरामीको भने उपचार रोकिएको छैन । ओपीडी सेवा सञ्चालनमै छ तर बिरामीहरू अस्पतालसम्म आइपुग्न सकेका छैनन् । डबल ड्युटीमा खटेर हामीले काम गरिरहेका छौँ । घर जाने अवस्था नभएकाले स्वास्थ्यकर्मीहरू अस्पतलामै रही काम गरिरहनुभएको छ’, उहाँले भन्नुभयो, ‘अहिले ५३ जना घाइतेको उपचार भइरहेको छ ।’
निर्देशक आचार्यका अनुसार ओपीडी नियमित रूपमा सञ्चालन भइरहेको, आकिस्मक सेवामा चाप रहेको, मुख्य शल्यक्रिया भने अहिलेलाई बन्द गरिएको र यातायात नियमित रूपमा चले भोलिदेखि सबै सेवा सञ्चालन गरिने छ ।राष्ट्रिय ट्रमा सेन्टरमा अहिले ४० जना घाइतेको उपचार भइरहेको छ जसमा चार जनालाई शल्यक्रियापछि आईसीयूमा राखिएको छ । ‘अहिले त अवस्था ठीकै छ । तर एउटा एम्बुलेन्स नै तोडफोड भएकाे छ’, अस्पतालका निर्देशक डा. बद्री रिजालले भन्नुभयो, ‘चिकित्सक र नर्स ल्याउन भने केही समस्या छ । स्रोत साधन अभावका बीच पनि उपचार सेवा रोकेका छैनौँ ।’परोपकार प्रसूति तथा स्त्रीरोग अस्पतालमा पनि चाैबीसै घण्टा सेवा सञ्चालनमा छ । जस्तोसुकै परिस्थितिमा पनि आफ्नो सेवालाई निरन्तरता दिने प्रतिबद्धता व्यक्त गर्दै अस्पतालका निर्देशक डा. श्रीप्रसाद अधिकारीले भन्नुभयो, ‘ओपीडी नियमित नै सञ्चालन छ, आकस्मिक सेवा चलिरहेकै छ । शुल्क लिएर दिइने सेवा (पेइड सर्भिस) बन्द गरिएको छ ।’
कमेन्ट गर्नुहोस्