गुल्मीको रेसुङ्गा विमानस्थलमा सातामा तीन पटक मात्र उडान हुने

गुल्मी ।गुल्मीको रेसुङ्गा विमानस्थलमा अबदेखि सातामा तीन पटक मात्र हवाई उडान गरिने भएको छ । नेपाल वायु सेवा निगमले यस अघि गुल्मीमा बिहीबार हुँदै आएको हवाई उडानको तालिकामा परिवर्तन गरेको हो ।नेपाल वायु सेवा निगमले यस अघि आइतबार, मङ्गलवार, बिहीबार र शनिवार गरि सातामा चार पटक उडान गर्दै आएको थियो । उडान तालिकामा परिवर्तन गरेसँगै अबदेखि आइतबार, मङ्गलवार र शनिवार गरी सातामा तीन पटक मात्र उडान हुने भएको रेसुङ्गा विमानस्थल गुल्मीका स्टेसन प्रमुख मन थापाले जानकारी दिएका छन् ।

नेपाल वायुसेवा निगमका हाल तीन वटा मात्र ट्विनअटर जहाज रहेको र उक्त जहाजहरू समय समयमा मर्मत गर्नु पर्ने भएका कारण जहाजको अभावमा केही समयका लागि निगमले यस अघिको नियमित तालिकामा परिवर्तन गरेको थापाले बताए । बर्सादको समय, खराब मौसम र बाक्लो हुसुका कारण बाहेक पछिल्लो तीन महिना गुल्मीको  रेसुङ्गा विमानस्थलमा नियमित रूपमा हवाई उडान हँुदै आइरहेको छ ।रेसुङ्गा विमानस्थलमा नेपाल वायुसेवा निगमले १८ सिट क्षमताको ट्विनअटर जहाजबाट काठमाण्डौदेखि बिहान ६ः३० बजे रेसुङ्गा विमानस्थलदेखि बिहान ७ :ः३० बजे उडान गर्दै आइरहेको छ । निगमले काठमाडौँबाट गुल्मीका लागि ७ हजार पाँच सय रुपैंया र गुल्मीदेखि काठमाडौँका लागि ७ हजार तीन सय रुपैयाँ भाडा दर निर्धारण गरेको छ । रेसुङ्गा विमानस्थलमा दिउसोको समयमा अत्यधिक हावाको चाँप हुने भएकोले प्राविधिक दृष्टिकोणले बिहानको समयमा मात्र उडान हुने गर्दछ ।

गुल्मीमा हवाई उडान सुरु भएसँगै जिल्लामा आउने आन्तरिक एवं बाह्य पर्यटकहरूको सख्ंयामा समेत बृद्धिहुँदै गएको छ । १८ घण्टा लामो यात्रा गरेर राजधानी पुग्नुपर्ने बाध्यता रहेको यस क्षेत्रका नागरिकहरूले आकाश मार्गबाट ४५ मिनेटमै सहज रूपमा गुल्मीबाट राजधानी आवतजावत गर्न सहज बनेको छ ।जिल्लामा हवाई सेवा लिने नागरकहरुको चाँप पछिल्लो समयमा बढ्दै गएको छ । तर यात्रुहरूको चाँप बढे पनि उडान सङ्ख्या थोरै हुने र उडान तालिकामा परिवर्तन भइरहने भएका कारण यस क्षेत्रका नागरिकहरू समस्यामा परेका छन् ।गुल्मीमा नेपाल वायुसेवा निगमले २०८० वैशाख २९ गतेदेखि व्यावसायिक रूपमा हवाई उडान सेवा सुरु गरेको थियो ।